I april 2024 var det første gullkanta tomtesalet i boks, og det til ein marknadsleiande næringsaktør. – Viktig for distriktet sitt store behov for arbeidsplassar, seier Nils Skjerping.

Stort logistikkbygg

Skjerping er prosjektleiar hos Romarheim Entreprenør, som er hovudentreprenør for Espevoll-prosjektet. Han meiner at næringsområdet var heilt nødvendig å realisere for å leggje til rette for næringsutvikling i Vestlandskommunen Osterøy, nordaust for Bergen.   – Mange arbeidsplassar har forsvunne innan landbruk, garveri, trevare, møbelindustri med meir, seier Skjerping.   Tomtekjøparen er K.J. Brusdal Norengros, som er Noregs største leverandør av forbruksvarer som medisinsk utstyr, møblar, kontor- og datautstyr til privat og offentleg sektor.   Salet gjeld 20 mål, med opsjon på meir. På tomta etablerer selskapet sitt nye logistikkbygg.   Etter å ha vunne eit stort anbod med Helse Vest Forsyningssenter, trong Norengros større lagringsplass, opplyser Sissel Brusdal Solhaug, eigar og marknads- og kommunikasjonssjef.   – Avtalen med Helse Vest Forsyningssenter inneber at vi skal ha lagerhald og logistikk av forbruksvarer til alle sjukehusa i Helse Vest, saman med våre kollegaer i Norengros Kjosavik i Stavanger, seier Solhaug.

– Kort veg til kundar

Det nye bygget på Espevoll blir eit supplement til Norengros sitt hovudlager i Arnadalen Terminalområde.   – Nærleiken til Arna, trafikkbildet og kort veg til fleire kundar er viktige årsaker til at Norengros sitt val av lokasjon fall på Espevoll Næringsområde, seier Solhaug vidare.   Parallelt med tomteprosjektet jobbar Osterøy Entreprenør med forbetra infrastruktur når fylkesvegen som går til næringsområdet blir bygd ut.

Klart første juli

Ruth Brusdal, medeigar og dagleg leiar i K.J. Norengros, trekkjer òg fram fokus på berekraftig og lønnsam vekst som eit viktig styringsbarometer for selskapet.   – Og vi er ganske sikre på at denne nyetableringa, samt auka aktivitet, vil skape fleire arbeidsplassar og leggje til rette for nye, gode kollegaer, seier Brusdal.   Norengros-tomta skal etter planen vere byggeklar til første juli, og sjølve bygget skal stå klart til jul, 2024.

Les meir på Romarheim.no